Pas më shumë se dy vite, Prokuroria për Krimet e Rënda ka përfunduar hetimet për ish-ministrin e Brendshëm, Saimir Tahiri.
Prokuroria ka dërguar sot për gjykim dosjen e ish-ministrit dhe nesër në orën 13.00 ai do të njihet me akuzat e ngritura ndaj tij, i hetuar prej dy vitesh për përfshirje në trafikun e drogës me grupin kriminal ‘Habilaj’.
Mësohet se bashkë me Tahirin janë marrë të pandehur edhe 3 ish zyrtarë të policisë së Vlorës, Jaeld Çela, ish-drejtorin e policisë së Vlorës, Sokol Bode dhe Gjergji Kohila, aktualisht të tre në arrati dhe sot prokuroria do t’u njoftojë avokatëve përkatës akuzat.
Kujtojmë se hetimet për ish-ministrin Tahiri janë shtyrë tri herë, ndërsa më 11 shkurt gjykata vendosi kërkesën e tij për mos zgjatjen e tyre.
Tahiri ka këmbëngulur vazhdimisht për pafajësi, megjithatë prokuroria duket se ka arritur në konkluzionin se ai duhet të përgjigjet para drejtësisë për disa akuza, që pritet të bëhen publike nesër.
