Një lajm i trishtë ka ardhur nga shkrimtarja e njohur Flutura Açka e cila përmes një postimi në faqen e saj në Facebook ka treguar se ka humbur djalin e saj 18-vjeç. Jerin van den Brink vuante nga një sëmundje e rrallë e cila fatkeqësisht i mori jetën në një moshë shumë të re.
Mesazhi i plotë i Flutura Açka
Miqtë e mi, Mbrëmë, në një orë të vonë të natës, u nda nga jeta Biri im i vetëm, Jerin van den Brink, në të tetëmbëdhjetat e tij, prej një sëmundjeje shumë të rrallë, nga e cila vuajti kohët e fundit. Nuk është e lehtë për një nënë ta lyejë bojën me të zezë për të tillë lajm, as ta pranoj humbjen e qenies më të dashur që pata, dhe kam, mbi këtë dhé. Me drojën se nuk do të mësohem kurrë me mungesën e tij, uroj të dëgjoj vetëm lajme të mira prej jush. Sipas dëshirës së Jerinit, ceremonia e lamtumirës do të mbahet me një rreth të ngushtë familjar e shoqëror në Utrecht të Holandës, ku im Bir jetonte prej disa vitesh, pas një fëmijërie të gjatë në Shqipëri. Për miqtë e mi në Shqipëri, do të jem në Atdhe përgjatë muajit qershor.
