Asambleja e pedagogëve kërkoi shfuqizimin e ligjit të arsimit të lartë dhe mbështetje për protestën e studentëve. Ata u mblodhën sot në godinën Liria për të diskutuar këto propozime. Në këtë mbledhje morën pjesë përfaqësues të Fakulteteve të ndryshme të Universitetit të Tiranës.
Mark Marku, drejtuesi i Departamentit të Gazetarisë iu bëri thirrje pedagogëve të reagojnë për denigrimin që po i bëhet figurës së profesorit. Sipas tij, VKM-të dhe vetë ligji kanë cënuar rëndë autonominë universitare.
Studentët kanë hyrë në javën e tretë të bojkotit të mësimit. Ditën e djeshme ata protestuan përpara Parlamentit dhe Kryeministrisë për plotësimin e kërkesave të tyre.
