Presidenti i Republikës, Ilir Meta bëri sot homazhe në Ambasadën amerikane në Tiranë për ndarjen nga jeta të Presidentit të 41-të të Shteteve të Bashkuara të Amerikës, George H. W. Bush.
“Për të gjithë popullin dhe kombin shqiptar kujdesi i veçantë dhe mbështetja e tij vendimtare në rrugën e lirisë dhe demokracisë do të mbetet e paharruar, së bashku me gjithë veprën e tij për një botë më të lirë, më të hapur dhe paqësore. Me mirenjohje!”, – shkroi Presidenti Meta në Librin e Zisë të hapur me këtë rast.
Më pas Kreu i Shtetit u shprehu zyrtarëve të Ambasadës amerikane ngushëllimet e sinqerta si dhe nderimin e respektin për Presidentin Bush dhe mirënjohjen për kontributin e tij të vyer ndaj kombit tonë dhe çështjes shqiptare.
