Një recetë mjaft e shijshme, që i bashkon në tavolinë të gjithë.
Përbërësit:
⦁ 1 kg pulë e prerë në copa; ⦁ 2 qepë; ⦁ 4 thelb hudhër; ⦁ 2 speca të kuq, të freskët; ⦁ 100 gr. ullinj; ⦁ 200 gr. domate të freskëta; ⦁ 1 konservë domate, (pa lëkurë, 270 gr.); ⦁ 1 spec djegës; ⦁ vaj për skuqje; ⦁ kripë, piper i bluar.
Përgatitja:
Copat e mishit të pulës i lajmë, i thajmë, i kriposim dhe i pudrosim me piper.
Në vajin e nxehur në tenxhere, skuqim copat e mishit të pulës, deri sa ato të marrin ngjyrën e verdhë të artë e më pas, i largojmë nga ena, duke i lënë në të ngrohtë.
Në të njëjtin vaj, zbusim qepën e grirë, shtojmë hudhrën e grirë dhe kur të fillojë të ndjehet aroma, shtojmë specat e freskët, dhe specin djegës, të prerë në katrorë, domatet e freskëta, të prera në kocka, duke i skuqur për pak dhe duke u shtuar në fund, domatet nga konserva të prerë në copa, bashkë me lëngun e tyre.
Më tej, shtojmë edhe ullinjtë, si dhe copat e pjekura të pulës.
Salcën e kriposim dhe e ziejmë ngadalë, të mbuluar me kapak, në zjarr të lehtë, për 25 minuta. Pulën e zbulojmë dhe e ziejmë, deri sa salca të fitojë dendësinë e duhur.
Ushqimi shërbehet me makarona apo si pjatë e dytë, sipas dëshirës.
