Ritmi i rritjes së të ardhurave buxhetore ka qenë edhe në prill i kënaqshëm, sipas shifrave zyrtare, të publikuara nga zyra e statistikës së ministrisë së Financave dhe Ekonomisë.
Të ardhurat Të ardhurat totale në buxhet për katërmujorin e parë të vitit arritën vlerën e 143.2 miliardë lekëve, me një rritje prej rreth 2.4% krahasuar me një vit më parë. Të ardhurat tatimore u rritën me rreth 3.5%, por një efekt negativ dha rënia e të ardhurave nga ndihmat dhe të ardhurave jotatimore. Të ardhurat e përgjithshme shënuan një realizim në masën rreth 95.8 për qind të planit të periudhës, ndërsa krahasuar me të njëjtën periudhë të vitit 2017 ky zë ka rezultuar rreth 3 miliardë lekë më shumë.
Një ecuri pozitive po vijon me vjeljen e Tatimit mbi Vlerën e Shtuar, që ka sjellë në arkën e shtetit 44.5 miliardë lekë, nga 41.9 një vit më parë në të njejtën periudhë, me një rritje në masën 6.2 për qind. Ndërkohë, akcizat kanë qendruar në vend me 12.9 miliardë. Importi dhe prodhimi vendas i karburantit rezultuan në rreth 161.878 ton, me një rritje 1% krahasuar me 4-mujorin e vitit 2017, ndërkohë që importi i cigareve u rrit 5%, importi dhe prodhimi i birrës 12%, importi dhe prodhimi i verës me 4%, importi i gazit të lëngët me 11% dhe importi i kafesë me 13%.
Tek renta minerare, të ardhurat për naftën bruto janë rritur me 161 milionë lekë, si rezultat i rritjes së sasisë së eksportuar me rreth 52 mijë ton dhe janë rritur me 74 milionë lekë si rezultat i rritjes së çmimit të naftës bruto në tregjet ndërkombëtare. Ndërkohë, të ardhurat nga mineralet e eksportuara kanë pësuar rënie. Ndërkohë që tatimi (kryesisht i punonjësve) mbi të ardhurat personale ka sjellë 9.6 më shumë fonde në buxhet, në të kundërt, tatim fitimi i ndërmarrjeve po vijon një kurbë rënëse, me 3 për qind më pak të ardhura të arkëtuara se një vit më parë në të njejtën periudhë. Ndërkohë, pushteti vendor shënon një rënie të ndjeshme në të ardhurat, me 11.4 për qind më pak se në periudhën janar-prill 2017. Sa u përket kontributeve, ato kanë vijuar të rriten kënaqshëm, me 10.8 për qind më shumë në sigurimet shoqërore dhe 7.7 për qind në fushën e sigurimit shëndetësor të shtetasve.
Shpenzimet Ndërkohë, vihet re se qeveria rriti mjaft shpenzimet. Në total ato shënuan 139.9 miliardë lekë, me një rritje në masën 9.1 për qind. Investimet janë rritur me 26.2 për qind krahasuar me vitin e kaluar, megjithëse shpërndarja e tyre gjatë vitit është shumë larg të qenit e njëtrajtshme. Për vitin 2018, janë planifikuar 86 miliardë lekë investime publike dhe në katër muaj janë realizuar vetëm 21% e tyre. Me ritme shumë të ngadalta po ecën edhe kompensimi i pronarëve, ku për katër muajt e parë të vitit janë shpenzuar vetëm 8% e katër miliardë lekëve të planifikuara në buxhetin vjetor, 20 për qind më pak se vjet. Ndërsa për të përndjekurit fatura është edhe më e rrudhur: 71.4 për qind më pak. Rënie e madhe është shënuar për pagesën e papunësisë, me 50% më pak fonde. Ndërkohë, vazhdon të rritet pesha e borxhit publik. Në rast se në katërmujorin e parë 2017 interesat e pagfuara ishin 9.8 miliardë lekë, këtë vit shifra u ngrit në 10.9 miliardë, me një rritje në masën 11.2%. Zëri që po ecën me hap më të shpejtë se parashikimet është ai i shpenzimeve për pushtetin vendor, me 17.5 miliardë lekë ose 35% më shumë krahasuar me një vit më parë. Buxheti ndodhet në sufiçit për rreth 3.3 miliardë lekë.javanews
