Sheshi “Veliera” prej rreth 1 vit e gjysëm ka mbetur një gërmadhë e hapur në zemër të Durrësit, në mes të portit detar e Torrës Veneciane. Investimi prej 6 milionë dollarësh është ndërprerë në mes dhe në fillim të sezonit turistik interesi i të gjithë durrsakëve dhe biznesit është qq t’i jepet një zgjidhje përfundimtare këtij sheshi, i cili prezanton Durrësin 3 mijë vjeçar, me çdo turist që hyn në qytetin port.
Arkeologu Neritan Ceka, tha se projektuesi i Velierës ka zgjidhur çështjen e trafikut, por ka sjellë gabimisht një projekt të tillë, për t’i bërë karshillëk Torrës Veneciane, e cila është stema e kulturës së këtij qyteti dhe simbol i bashkisë së Durrësit. Sipas tij, konsulenti arkeologjik i këtij projekti duhet ‘nderuar’ me medaljen e artë të injorantit.
“Ngritja e Velierës është një nga aktet më obskurantiste që mund të ndodhin në Shqipëri”,- tha Ceka
Neritan Ceka nuk di të thotë për të ardhmen e sheshit, i cili ka mbetur gërmadhë dhe peng i Gjykatës Administrative. Sipas tij, fondet për këtë projekt mund të ishin transferuar në projekte të tjera për qytetin e Durrësit.
Këto deklarata janë bërë në Durrës ku është duke u mbajtur konferenca shkencore “Kultet e Adriatikut”, e cila ka mbledhur ekspertë të Arkeologjisë të Shkollës franceze të Romës dhe Universitetit Ausonius-Bordeaux-Montaigne, por edhe arkeologë e historianë të njohur nga Shqipëria, Kroacia, Franca, Italia dhe Sllovenia.
