Një helikopter turk ka hyrë në perimetrin e ishullit grek të Ro, në perëndim të ishullit të Dodekaneses së Kastelorizos, në orët e vona të së hënës dhe ka fluturuar në 100-200 metra lartësi, raporton “Kathimerini”.
Por ai ka dalë menjëherë nga hapësira ajrore greke, pasi forcat helene i janë përgjigjur me zjarr paralajmërues përmes një mitrolozi të lehtë 762 mm.
Nuk bëhet ende me dije se çfarë lloj helikopteri u përfshi në incident, i cili mësohet se ka ndodhur rreth orës 23:30 të së hënës.
Por burime brenda ministrisë së Mbrojtjes greke thanë se ushtria greke iu përgjigj sipas rregullave dhe se ministri Panos Kamenos, ishte në kontakt të vazhdueshëm me Komandantin e Përgjithshëm të Forcave të Armatosura dhe Shefin e Shtabit të Ushtrisë.
Edhe kryeministri Aleksis Cipras u informua për incidentin.
Athina akuzoi Ankaranë dhe e kërcënoi se provokime të tilla të vazhdueshme duhet të frenohen, pasi do të marrin përgjigjen sipas rregullave ndërkombëtare.
Të dielën, dy avionë luftarakë turq F-16 shkelën vijën ajrore greke, duke injoruar moratoriumin jozyrtar të aktivitetit ushtarak mes dy vendeve, gjatë pushimeve të festave fetare.
